ភ្នំពេញ ៖ នៅដើមសប្តាហ៍នេះ ក្រសួងយុត្តិធម៌បានចេញនូវសេចក្តីជូនដំណឹងមួយស្តីពីការជ្រើសរើសក្រឡាបញ្ជី និងមន្រ្តីរាជការឱ្យទៅបម្រើការងារនៅសាលាដំបូងខេត្តកែបទៅតាមគោលការស្ម័គ្រចិត្ត។
ក្នុងសេចក្តីជូនដំណឹងនោះ ក្រសួងយុត្តិធម៌បានធ្វើការជូនដំណឹងទៅកាន់លោក លោកស្រី អ្នកនាងកញ្ញា ដែលជាក្រឡាបញ្ជី និងមន្រ្តីរាជការបម្រើការងារនៅរដ្ឋបាលកណ្តាលក្រសួងយុត្តិធម៌ និងនៅតាមអង្គភាពសាលាជម្រះក្តីគ្រប់ជាន់ថ្នាក់ ពាក់ព័ន្ធទៅនឹងការជ្រើសរើសក្រឡាបញ្ជី ១០រូប និងមន្រ្តីរដ្ឋបាល ១០រូប ទៅបម្រើការងារនៅសាលាដំបូងខេត្តកែប ដែលនឹងចាប់ផ្តើមដំំណើរការនៅថ្ងៃទី ២៤ ខែកញ្ញា ឆ្នាំ ២០២១ នេះតទៅ។
ក្នុងសេចក្តីជូនដំណឹងនោះក៏បានបន្ថែមថា ប្រសិនបើលោក លោកស្រី អ្នកនាងកញ្ញា ដែលជាក្រឡាបញ្ជី និងមន្រ្តីរាជការដូចបានជម្រាបជូនខាងលើ មានបំណងចង់ទៅបម្រើការងារនៅសាលាដំបូងខេត្តកែប សូមអញ្ជើញមកដាក់ពាក្យស្នើសុំបម្រើការងារនៅនាយកដ្ឋានកិច្ចការបុគ្គលិក នៃសាលាជម្រះក្តី នៃអគ្គនាយកដ្ឋានកិច្ចការរដ្ឋបាលតុលាការ រៀងរាល់ម៉ោងធ្វើការចាប់ពីថ្ងៃជូនដំណឹង រហូតដល់ថ្ងៃទី ១៣ ខែសីហា ឆ្នាំ ២០២១ ដោយភ្ជាប់មកជាមួយនូវសំណុំឯកសារមួយចំនួនដូចជា៖ ១. ពាក្យស្នើសុំបម្រើការងារ ២. ប្រវត្តិរូបសង្ខេប ៣. ប្រកាសចូលបម្រើការងាររបស់សាមីខ្លួន។
គួររំឮកថា កាលពីថ្ងៃទី ១៣ ខែមេសា ឆ្នាំ ២០២១ ព្រះករុណា ព្រះបាទ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ដាក់ឱ្យប្រើប្រាស់នូវសាលាដំបូងខេត្តកែបចាប់ពីថ្ងៃទី ២៤ ខែកញ្ញា ឆ្នាំ ២០២១ តទៅដើម្បីបង្កលក្ខណៈងាយស្រួលដល់ពលរដ្ឋដែលមានវិវាទក្នុងការដោះស្រាយរឿងក្តីនៅក្នុងមូលដ្ឋានខេត្តកែបផ្ទាល់តែម្តង ដែលកន្លងមកវិវាទដែលកើតឡើងត្រូវបានបញ្ជូនទៅដោះស្រាយនៅសាលាដំបូងខេត្តកំពត៕
